O equipo de Alberto Tamayo pecha a pretemporada con vitoria e xa pensa no debut ligueiro ante o Vilalonga B
O Municipal de Oira viviu unha mañá de celebración con motivo do II Trofeo Internacional de Canedo, onde a EFF Rosalía impúxose ao Boavista FC (1-0) nun encontro igualado, con poucas ocasións, pero que serviu para reforzar a confianza do equipo ourensán antes da súa estrea ligueira na 1ª División Galega Feminina Arzúa-Ulloa DOP.
A xornada comezou cun ambiente especial, marcado pola presentación oficial de todos os equipos do club, que desfilaron ante unha afección que encheu de cor e apoio as bancadas do Municipal de Oira.
No deportivo, o partido decidiuse moi pronto: no minuto 13, un contragolpe conducido por Sara terminou cun centro ao segundo pau que Antía transformou no único gol do encontro. Antes, Noui xa tivera a primeira ocasión clara (min. 11’). O Boavista, ordenado en defensa e con bo trato de balón, apenas xerou perigo real, máis aló dun disparo de Inés que saíu pegado ao pau no minuto 25′ e varios intentos afastados de Frazao ben resoltos por Karla na segunda metade.
As pontinas, pola súa banda, trataron de ampliar a vantaxe con chegadas de Noui (74’) e unha falta directa de Sabela (86’), pero o marcador xa non se moveu. No plano individual, o gran partido de Sampayo e o bo papel de Mihret foron claves nun partido de moito esforzo colectivo.
Con esta vitoria, o conxunto dirixido por Alberto Tamayo levanta o II Trofeo Internacional de Canedo e pecha a preparación con sensacións positivas tras poñer o broche final a unha pretemporada na que sumou dúas derrotas (ante Lóstrego e Valladares) e tres vitorias nos últimos tres encontros preparatorios (San Mateo, Arroyofresno e Boavista). Un balance que permite chegar ao debut ligueiro con confianza renovada. Agora, o equipo centra todas as súas miradas na próxima fin de semana, cando se estreará na competición ligueira visitando ao Vilalonga B, no inicio dunha campaña ilusionante.
