As pontinas reciben mañá domingo o quinto clasificado coa intención de dar continuidade á vitoria conseguida en Iñás (17:00 h; en directo a través de tiivii.gal).
A Escola de Fútbol Feminino Rosalía afronta maña, en sesión de tarde, un novo compromiso ligueiro no Municipal de Oira. O conxunto pontino recibe o Victoria FC no encontro correspondente á novena xornada da Terceira Federación de Fútbol Feminino, co obxectivo de sumar un novo resultado positivo e prolongar as boas sensacións amosadas na súa última saída. O encontro terá un horario pouco habitual, xa que o balón botará a rodar ás 17:00 horas, en lugar das tradicionais 12:30 horas. Ademais, o partido poderá seguirse en directo a través de tiivii.gal, que ofrecerá a retransmisión do encontro.
As xogadoras de Alberto Tamayo chegan á cita despois de conseguir en Iñás a súa primeira vitoria da tempada sobre o terreo de xogo. As pontinas protagonizaron unha gran remontada ante o Atlético San Pedro (1-2), nun encontro no que Laura igualou o marcador no minuto 66′ e Aldarita culminou a remontada no minuto 101′, tras unha asistencia da propia Laura. Un triunfo de enorme valor para un equipo que viña amosando boas sensacións nas últimas xornadas e que agora quere trasladar esa evolución ao Municipal de Oira. O empate sen goles ante o Victoria CF ‘B’ e a posterior vitoria en Iñás permiten ao Rosalía encadear dúas xornadas sen coñecer a derrota.
“Se somos capaces de competir con personalidade, teremos as nosas opcións”, Alberto Tamayo
O técnico, Alberto Tamayo, espera que o resultado da pasada xornada supoña un impulso para as súas xogadoras, aínda que insiste na importancia de manter os pés no chan e continuar mellorando: “A vitoria en Iñás era importante para o grupo, sobre todo pola maneira na que chegou. O equipo creu ata o final, non deixou de competir e atopou o premio ao seu traballo. Agora temos que darlle continuidade. Non podemos pensar que xa está todo feito, senón utilizar estes tres puntos para seguir medrando e afrontar con confianza o seguinte partido”. O adestrador tamén é consciente da dificultade que presenta o compromiso do domingo, ante un rival que destaca especialmente pola súa capacidade ofensiva: “Sabemos que nos enfrontamos a un equipo con moita capacidade ofensiva, que conta con xogadoras determinantes e que está a facer unha boa tempada. Teremos que estar moi concentradas, ser solidarias no traballo defensivo e aproveitar as nosas oportunidades. Se somos capaces de competir con personalidade e manter a orde durante todo o partido, teremos as nosas opcións”.
CONVOCATORIA
Victoria FC
O equipo de Tomás Francisco Mougan chegará a Ourense situado na quinta posición da clasificación, con 17 puntos, despois de sumar cinco vitorias, dous empates e unha derrota nas oito primeiras xornadas. Os seus números ofensivos falan por si sós: 25 goles a favor e só oito en contra. O conxunto visitante conseguiu impoñerse por 2-1 ao Boiro no seu último compromiso e atravesa un bo momento de resultados, con tres vitorias e dous empates nos seus cinco encontros máis recentes. No apartado individual sobresae Uxía Romero, que suma sete tantos e figura entre as máximas goleadoras da categoría. Tamén destaca Enma Baliña, con cinco goles, mentres que Alba Calviño e Laura Portabales acumulan tres tantos cada unha.
O Rosalía-Victoria FC disputarase este domingo 8 de novembro, ás 17:00 horas, no Municipal de Oira. O encontro será retransmitido en directo por tiivii.gal. Cómpre lembrar que nesta ocasión non se xogará no horario habitual das 12:30 horas.
