5-0: Goleada ante o Lóstrego ‘C’

As de Tamayo sumaron os tres puntos na sétima xornada cos goles de Zaira (2) e Sanmiguel (2) e o tanto de Bonjoch.

A Escola de Fútbol Feminino Rosalía goleou ao Lóstrego ‘C’ nun partido que dominou de principio a fin e no que mesmo mereceu maior renda tras fallar varias ocasións claras. Zaira, cun espectacular zurdazo, adiantou ao noso equipo a en o primeiro minuto. Tras o descanso, as de Tamayo desatáronse e aseguraron os tres puntos nesta sétima xornada do grupo B da segunda división galega co dobrete de Sanmiguel, a precisa definición de Bonjoch e o tanto de Zaira tras asistencia da centrocampista. Debutou Soraya, que saíu ao campo aos 77 minutos de xogo por Sampayo.

A Escola de Fútbol Feminino Rosalía saíu dominador ao céspede do Municipal de Oira. Cunha presión moi alta, as de Tamayo recuperaban rápido e en campo contrario e os réditos chegaron moi pronto. Ao minuto adiantáronse no marcador. Foi un golazo. Sampayo recibiu lonxe da área, levantou a cabeza e sacouse un centro que Zaira rematou cun zurdazo ante o que pouco puido facer a porteira visitante. Mesmo puido chegar o segundo tanto local un minuto máis tarde, pero o disparo de Zaira, tras unha xogada persoal, foi desviado por Catalina.

O ritmo baixou, pero Rosalía seguía encadeando xogadas de perigo. O poste repeleu un disparo de Zaira no 18’ e no 24′, a dianteira filtrou un balón ao desmarque de Laura, que tenta un globo ante a saída de Catalina, pero o balón sae alto. Tres minutos despois, tentouno Jimena cun disparo que terminou nas mans de Noa. No 34’, foi Clau a que xerou perigo desde a dereita, Catalina despexa e, o balón tras outro rexeite entre Sheila e Sampayo, termina aos pés de Bonjoch no balcón da área, pero o seu disparo a porta baleira pérdese por encima do traveseiro. Nos últimos cinco minutos, outras dúas chegadas con Clau e Zaira como protagonistas. Na primeira, a dianteira remata dentro da área un centro da interior, saíndo o balón pegado ao pau. E inmediatamente despois, Clau envía ao lateral da rede ante a saída da gardameta visitante.

Goleada
A volta de vestiarios, o noso rival saíu a desbaratar a desvantaxe inicial e gozou de tres ocasións case consecutivas en dous minutos. No 52′, Inés tenta sorprender a Noa de libre directo sen logralo. Un minuto despois, Jimena proba desde o frontal pero bloca a nosa gardameta e, inmediatamente despois, Alba combina con Jimena, ve a Noa adiantada, dispara desde 25 metros e o seu potente disparo estrelouse no poste. Segunda ocasión na que o pau evita un tanto o encontro. Isto espertou ao noso equipo e as de Tamayo, dous minutos despois de superar a hora de xogo, buscaron o segundo gol e chegou aos 62 minutos. Bonjoch recuperou a posesión tras un saque de banda das gondomaresas, rompeu a liña defensiva e, ante a saída de Catalina, asiste a Zaira, que a empuxa ao fondo da rede.O noso equipo seguía atacando e a vantaxe aumentou no 65. Pase de trinta metros de Aline ás costas da liña defensiva rival, Bonjoch recolle o esférico e cruza ante a saída de Catalina.

A vantaxe era xa de tres goles e no 77’ chegou o debut de Soraya. Foi o preámbulo aos dous últimos goles do encontro. Antes, Matilde tivo unha ocasión anterior a centro de Clau. O primeiro chegou no 82’ cun remate preciso de Sanmiguel a centro de Clau. O segundo, catro minutos despois tras un vistoso centro de Sabela ás costas da liña defensiva que Bonjoch, no canto de rematar, cede a Sanmiguel a porta baleira. A dianteira transformou e pechou a goleada das de Tamayo a pesar de gozar cunha última ocasión, pero Catalina despexou a córner. Sexta vitoria consecutiva ante un rival que non cambiou o seu estilo a pesar de ir por detrás do marcador.

FICHA TÉCNICA:
5-Rosalía: Noa, Lú (Aline, 41′), Aldarita, Zaira, Clau, Bonjoch, Laura, Sampayo (Soraya, 77′), Miriam (Matilde, 77′), Candela (Sanmiguel, 77′) e Aitana (Sabela, 46′).
0-Lóstrego C: Catalina, Sheila, Carlota, Laura Nicolás (Laura Conde, 68′), Iria, Laura Villar (María, 52′), Alba, Jimena, Josefa, Marta (Ilduara, 86′) e Inés.

Goles:
1-0 (min.1): Zaira
2-0 (min.62): Zaira
3-0 (min.66): Bonjoch
4-0 (min.82): Sanmiguel
5-0 (min.87): Sanmiguel

Tarxetas:
Amarelas: Alberto Tamayo (80′, Final)