Tobaruela: “Está claro que hoxe non fun quen de transmitirlles ben que eran capaces de tirar adiante facendo o que saben facer”

“Tivémolo cerca, case na man, pero non soubemos aproveitar as oportunidades das que dispuxemos”, engadiu o técnico.

Pere Tobaruela compareceu en zona mixta do Municipal de Oira tras o partido de volta da final da fase de ascenso a Primeira. O adestrador da Escola de Fútbol Feminina Rosalía declarou: “Nun partido no que xogas o ascenso a valoración a curto prazo, por dicilo así, é evidente: non conseguimos ascender, polo tanto é unha valoración negativa. Visto con máis perspectiva non teño máis que salientar a gran temporada que fixeron as xogadoras, e non o digo por dicir. Foron quen de medrar, de saber estar, de chegar ata a final, mais sen premio. Como se di no noso mundo, fútbol é fútbol”.

O equipo non conseguiu facer o seu xogo
“Está claro que hoxe non fun quen de transmitirlles ben que eran capaces de tirar adiante facendo o que saben facer e teñen demostrado outras veces: xogar ao fútbol facendo unha proposta de control do partido a través da posesión do balón. Sufrimos cando non o temos. Pero diso tamén teñen mérito as rivais, que souberon contrarestarnos. Dito isto, non queda máis que felicitar ás xogadoras do Domaio, como xa fixen ao rematar o encontro, e desexarlles que a tempada vindeira gozen da experiencia de xogar en Primeira Galega”.

Domaio tivo un plan, cumpliuno e conseguiu ou premio
“Efectivamente, as xogadoras do Domaio executaron ben o seu plan de partido e souberon non deixarnos entrar en xogo. Como dixen, iso é merito delas”.

Eliminatoria final
“Unha valoración obxectiva da eliminatoria lévame a afirmar que o Domaio é o xusto vencedor, máis alá de que así sexa en realidade. Tivémolo cerca, case na man, pero non soubemos aproveitar as oportunidades das que dispuxemos”.

Plantel xoven que gaña experiencia con partidos así
“Está claro que o equipo tan novo da Escola de Fútbol Feminina Rosalía ha medrar, de feito xa medrou, pero non tanto pola mala experiencia de caer derrotadas hoxe. Medraron e han seguir medrando polo traballo semanal e pola súa capacidade e vontade de aprender. Máis alá disto, hoxe é un día duro para elas”.

Valoración da tempada
“Valorar en poucas liñas unha tempada é ben díficil. Direi dúas cousas que en certa maneira redundan co que acabo de dicir. A primeira, o equipo mellorou, medrou. A segunda, non conseguimos o obxectivo de ascender”.

Futuro
“O futuro é ben difícil de predecir, mais a simple vista creo que está claro: a Escola de Fútbol Feminina Rosalía, empezando polo equipo sénior e pasando por todas as xogadoras das distintas categorías, está a medrar desde hai tempo e vai seguir medrando. Elas, as xogadoras, son as verdadeiras protagonistas, e van chegar ata onde queiran chegar. Con traballo e esforzo van conseguilo. Só hai que axudalas, deixar e respectar o seu espazo, confiar nas súas capacidades, potencialas, e deixar que aprendan e sexan elas mesmas as que den o paso adiante… É a miña maneira de ver o fútbol”.