E.F.F. Rosalia Escola de Fútbol Feminino
Nun derbi vibrante, con gran ambiente nas bancadas, os goles de Xiana serviron para levarse un partido no que recortou distancias Sofía co asubío final.
A Escola de Fútbol Feminino Rosalía ‘Azul’ imponse nun derbi precioso no Municipal de Oira. Os goles de Xiana na primeira parte serviron para selar a vitoria a pesar do tanto final de Sofía. Con este novo triunfo, as de Alberto Tamayo enlazan tres partidos sen perder e seguen escalando na táboa.
A primeira parte non tivo un claro dominador e Sara no minuto 26 tivo a mellor ocasión para as ‘amarelas’, pero o seu disparo cortouno a córner Aitana. Esmeralda atopou a resposta nunha rápida transición onde termina sendo derrubada dentro da área. Xiana non perdoa desde os once metros e adianta ás visitantes dous minutos despois de cumprirse a media hora de xogo (0-1). Cinco minutos despois, novamente Xiana, nun precioso remate de cabeza tras servizo de Antía, aumentou a vantaxe coa que se chegou ao descanso.
A pesar da vantaxe de dous goles, o choque estaba vivo, aberto e as de Javier Alonso deron un paso adiante a volta de vestiarios. Sanmiguel salvou o 1-2 nun remate de Sofía, e aínda que a interior e Sara foron puñais polas bandas, non atopaban o remate final que as achegase no marcador. A ocasión máis clara chegou tras un disparo de Candela que Karla despexa ao pau no minuto 66. As chegadas continuaban e Sara, no minuto 71 e Candela, no 77 forzaron as intervencións de Karla. Tivo que ser Sofía, co tempo cumprido, quen batese á meta rival para marcar o gol da honra, ao non haber tempo para máis.
